Р.Бурмаа сайд Халх голын талаар баримт дэлгэж, АТГ-д хандлаа

Халх голын 500 мянган га газрыг чалаат бүс нэрийдлээр гадаадынханд өгөх гэж байна хэмээн нутгийн иргэд эсэргүүцэл илэрхийлэн жагсаал цуглаан хийж буй. Өнгөрсөн долоо хоногт шүүмжлэлийн бай болсон Хүнс хөдөө аж ахуйн сайд Р.Бурмаа орон нутагт очиж ажиллах гэсэн боловч нутгийн иргэд эсэргүүцэн жагсаал цуглаан хийж, сайдыг хөөж явуулсан гэсэн мэдээлэл гарч байсан. Тэгвэл Р.Бурмаа сайд Дорнод аймгийн Халх гол суманд ажиллах үеэрээ нутгийн удирлагуудын хуууль зөрчсөн үйлдлийг илрүүлсэн байна.

Тэрээр өнөөдөр энэхүү баримтуудаа Авлигатай тэмцэх газар шалгуулахаар өнөөдөр гардуулан өглөө. Үүнд Ц.Насанхүү, В.Мөнхтайван нарын газрыг хууль бусаар гадныханд эзэмшүүлсэн баримт байгаа юм байна. 

Тухайлбал, Дорнод аймгийн Халх гол сумын ИТХ-аас 2009 онд 100 хувь Солонгосын хөрөнгө оруулалттай “Хансоломо” компанид 25966 га газрыг хууль бусаар өгчээ. Энэхүү шийдвэрийг Халх гол сумын ИТХ-ын дарга Ц.Насанхүү, тэргүүлэгч Л.Энхтөр, Д.Дулмаа, Ч.Дүдлийнамжил, М.Уртнасан нар гаргасан байна.

Энэ талаар хурлын тэмдэглэлд “Халх голын ялалтын ойн өдрийг тохиолдуулаад Засаг даргаар тогтоол гаргуулъя, цаашид гэрээгээ тав, 10 жилээр сунгаж ажиллахад татгалзах зүйлгүй” хэмээж газар эзэмшүүлэх эрхийг тухайн өдөр нь гаргаж өгсөн байх юм. Гэвч энэхүү хууль бус шийдвэр нь 2011 онд илэрч ИТХ-ын даргаар Н.Буяндэлгэр томилогдож тус хууль бус шийдвэрийг цуцалжээ. Гэвч Солонгосчууд 25966 га талбайг ашиглах эрхийг Үйзэн тал, Цог Октаэрд, Ашдын нөхөр гэсэн гурван компанид шилжүүлсэн байгаа юм.

Холбогдох байгууллагын шалгалтаар эдгээр компаниуд нь ямар үйл ажиллагаа явуулдаг нь тодорхойгүй байсан аж. Түүнчлэн газар эзэмших эрх авсан компаниуд хэдхэн хоногийн дараа эрхээ өөр компаниудад шилжүүлсэн байна. Тодруулбал, Үйзэн тал компани 14232 га талбайгаа Голденсояа, Нью-Ариг-Ус компанид хуваан худалджээ. Цог Октаэрд компани нь 6917 га талбайн эзэмших эрхээ Хожуулын эх компанид тус тус дамлан худалдсан байна. Газар эзэмших эрх цуцлах тогтоол гарсаны дараахан компани хооронд газар эзэмших эрх шилжсэн байгаа нь багагүй хэмжээний мөнгөтэй холбогдох газрын наймаа байсан уу гэж хардахад хүргэж байгаа юм.

Халх гол дахь газрын наймаа үүгээр эцэслэгдсэнгүй. Дорнод аймгийн Халх гол сумын одоогийн Засаг дарга В.Мөнхтайван Хадлангийн талбай түрээслэх нэрийдлээр 6000 гаруй га талбайг хууль бусаар эзэмшүүлсэн байна. Тухайлбал, Хятадын хөрөнгө оруулалттай “Соёмбо буудай” компанид 1621 га талбайг “Үйзэн тал” компанид эхлээд долоон мянга, сүүлд 14 мянга га талбайг эзэмшүүлжээ. Энэ мэт тус аймгийн нутгийн удирдлагууд газар нутгаа хууль бусаар зарж, худалдсан хууль бус үйлдлийг АТГ шалгуулахаар болсноо өнөөдөр сэтгүүлчдэд мэдээллээ.

А.АМАР

скачать dle 10.6фильмы бесплатно
Шинэ мэдээ
Их уншсан